霍啟剛宣布參選2021立法會選舉，角逐「體育、演藝、文化及出版」功能組別，為他站台的包括香港乒乓球隊教練李靜、港協暨奧委會義務副秘書長黃寶基、無綫電視總經理曾志偉等。 

體育、演藝、文化、出版激發一個城市嘅創新同活力，係我哋生活不可分割嘅一部分。經歷接近兩年嘅新冠肺炎疫情，業界從徬徨無助、設法自救到適應新常態，憑住堅持不懈同努力求變，每一步走得有血有汗。上年立法會換屆選舉，我一度報名參選體育、演藝、文化及出版界功能界別，但係遇上史無前例嘅延期。回歸到原本嘅崗位，為業界服務嘅工作從未停步，亦喺度感謝業界朋友對我嘅信任，喺書展延期嘅時候，同我一齊爭取政府支持，一齊推動全城投入東京奧運熱潮，仲有好多好多工作，多謝大家。

今年喺我哋業界各個領域入面，都有好多令人振奮嘅消息： 中央喺《十四五規劃》中提出支持香港發展中外文化藝術交流中心嘅新定位、我亦爭取到「國家藝術基金」過河落戶香港支持業界發展、政府首次購入奧運電視轉播權、業界期盼多年嘅文化體育旅遊局終於明朗等等。我相信，香港作為傳承同弘揚中華文化嘅重要樞紐，將國家嘅文化體育軟實力輸出國際，用好自身優勢貢獻「雙循環」，會係國家給予香港嘅重大課題。

喺《國安法》實施同完善選舉制度之後，香港重新出發。對於今年係咪再參選，我亦思考咗好多，以往選舉係政治嘅對壘，依家喺新嘅制度下，選舉昇華至實力對壘，選民亦要求候選人係做實事。港澳辦主任夏寶龍提出「五個善於」，愛國愛港係對候選人嘅基本要求，除此之外，未來更加需要候選人展現自己能力同服務業界、市民嘅決心。

所以，完善選舉制度給予我哋更多空間做得更好，新一屆立法會議員除咗監督政府同審議法案嘅工作外，更加需要親力親為為民眾辦實事。如果我有幸當選立法會議員，期望能夠喺立法會嘅平台，推動我嘅業界發展新概念——「文體+」概念——即係以體育、演藝、文化、出版為核心，同科技、旅遊、金融、工業等等打造跨界別合作；為業界做更多實事，弘揚中華文化，同業界一齊貢獻大灣區發展，並為未來成立嘅文化體育旅遊局出謀獻策。

我嘅參選口號係：連結、跨越、創造。第一步係連結不同界別，互相認識；然後跨越界限，互相融入；最後一步係一齊創造更多可能。意思層層遞進，無論最終我係咪能夠成功當選，呢句口號都係我未來工作嘅指標。

希望大家繼續支持我嘅工作！多謝！

资訊來自霍啟剛臉書